«Ինչպես գոյատևել որպես սկսնակ արվեստագետ 2․0»

Ժամանակակից արվեստի ինստիտուտը և ArtNexus-ը հայտարարում են «Ինչպես գոյատևել որպես սկսնակ արվեստագետ 2․0» ծրագրի երկրորդ թողարկման դիմումների ընդունելությունը։ 

Ծրագիրը ինտենսիվ դասախոսությունների շարք է՝  ուղղված է երիտասարդ և սկսնակ արվեստագետների կարողությունների հզորացմանը։

Ծրագիրն իրականացվում է Շվեդիայի Արվեստի դրամաշնորհների կոմիտեի կողմից ֆինանսավորվող ArtNexus ծրագրի օժանդակությամբ։

Ծրագրի տևողությունը երեք ու կես  ամիս է․ 2024թ․ մարտի կեսից հունիսի վերջ։ Ծրագրին մասնակցությունը անվճար է։

Դիմելու վերջնաժամկետն է 2024թ․ փետրվարի 20-ը։

Ծրագրի մասին

Ծրագիրը ծնվել է երիտասարդ արվեստագետների՝ տարբեր առիթներով մեզ ուղղված հարցերից․

• Ինչի՞ց սկսել

• Ինչպե՞ս ստեղծել պորտֆոլիո

• Ինչպե՞ս ինքնակրթվել

• Ինչպե՞ս համագործակցել ցուցասրահների հետ

• Ինչու՞ է պետք աշխատել համադրողի հետ 

• Ինչպե՞ս մասնակցել միջազգային ցուցահանդեսների և արվեստի կացարանների ծրագրերի

• Ինչպե՞ս ստանալ դրամաշնորհներ

• Ինչպե՞ս ճանաչում ձեռք բերել

Եթե ձեզ նույնպես հուզում են այս հարցերը, ապա դիմե՛ք այս ծրագրին, որի ընթացքում դուք ավելի լավ կճանաչեք ձեզ և ձեր արվեստը, կսովորեք ձեզ ճիշտ ներկայացնել, կհղկեք ձեր պորտֆոլիոն և արվեստագետի դիրքավորումը (artist statement), կստեղծեք մասնագիտական ծանոթությունների ցանց և ամենակարևորը՝ ծրագրի մյուս մասնակիցների հետ համատեղ կիրագործեք ավարտական խմբային նախագծեր փորձառու կուրատորների հետ համագործակցությամբ։

Ինչո՞վ է առանձնանում այս ծրագիրը

Թեև այս ծրագրի շրջանակում մասնակիցները կստանան ցանկացած ստեղծարար ոլորտում կիրառելի գիտելիքներ, մենք հատկապես շեշտադրում ենք տեսողական (վիզուալ) արվեստի ոլորտը իր տարբեր հոսքերով և ենթաժանրերով։ Ուստի, ընտրության հարցում նախապատվությունը կտրվի վիզուալ արտիստներին։ 

Երկրորդ կարևոր հանգամանքը այն է, որ ծրագիրը լեցուն է և ընդգրկում է արվեստի աշխատանքի կազմակերպման, հաղորդակցության, մարքեթինգի, ինքնաներկայացման, արվեստի շուկայի թրենդերի և այլ գործընթացների վերաբերյալ դասընթացներ, միաժամանակ մեծ ուշադրություն հատկացնելով արվեստագետների, կուրատորների և արվեստի մենեջերների հետ համագործակցության և գործառույթների վերաբաշխման հմտություններին։

Ո՞վ կարող է դիմել

Ծրագրին կարող են դիմել մասնագիտական գործունեության վաղ շրջանում գտնվող 18-ից 30 տարեկան արվեստագետներ ՀՀ-ից։ Նախընտրությունը տրվում է  տեսողական (վիզուալ) արվեստագետներին։

Դասընթացի աշխատանքային լեզուն հայերենն է։ Միջազգային դասախոսությունների ընթացքում կտրամադրվի համաժամանակյա թարգմանություն։

Ի՞նչ ակնկալել ծրագրից

Ծրագրի մասնակիցները կընկղմվեն ժամանակակից արվեստի աշխարհ, կծանոթանան հայաստանյան և համաշխարհային արվեստի դաշտում տեղի ունեցող կարևոր իրադարձություններին, թրենդերին, արվեստի վաճառքի առցանց և անցանց հարթակներին և արվեստի շուկայի ներքին կանոններին։ Դասընթացները կվարեն Հայաստանից և արտերկրից մի շարք անվանի մասնագետներ՝ արվեստի մենեջերներ, տեսաբաններ, համադրողներ և հարակից ոլորտների փորձագետներ։

Ծրագրի կարևոր գործնական նպատակներից է մասնակիցներին տրամադրել գիտելիքներ ստեղծագործ արտադրության բոլոր փուլերի մասին՝

• Արվեստագետի ինքնաճանաչում և իր ուղերձի ձևակերպում, 

• Ինքնաներկայացում և պորտֆոլիոյի կառուցում,

• Հաղորդակցություն և տեսանելիություն,

• Մասնագիտական ոլորտում դիրքավորում, 

• Համագործակցություն, մասնագիտական կապերի ստեղծում,

• Աշխատանք համադրողների և ցուցասրահների հետ,

• Միջազգային կապեր, դրամաշնորհներ և այլ հնարավորություններ։

Ծրագրի ավարտին դուք կունենաք ձեր ճանաչելի դիմագիծը իբրև արվեստագետ, գրագետ կազմված պորտֆոլիո, անհրաժեշտ գիտելիքներ արվեստի ոլորտի մարքեթինգի ասպարեզում, հաղորդակցության գործնական հմտություններ, բազում մասնագիտական կապեր և իրագործված ավարտական նախագիծ։

ՀՀ մարզերից ընտրված մասնակիցներին կտրամադրվի ճանապարհածախս հոգալու կրթաթոշակ։

Մասնակիցները պետք է հաճախեն դասընթացների նվազագույնը 75%-ին ավարտական նախագծերում ընդգրկվելու և մասնակցության վկայական ստանալու համար։

Դիմելու համար լրացրեք այս հարցաշարը։

Հարցաշարին կցվող փաստաթղթերի ցանկը`

• Ինքնակենսագրական (ռեզյումե);

• Պորտֆոլիո (կարող է ներկայացվել նաև առցանց Behance, Dribble, Instagram կամ այլ համապատասխան հարթակներում): Պորտֆոլիո պատրաստելու համար կարող եք օգտվել պորտֆոլիո կառուցելու խորհուրդներից և պորտֆոլիո կառուցելու ձևանմուշից։

Ծրագրի մասնակիցներն ընտրվելու են այդ նպատակով ձևավորված Ընտրող հանձնաժողովի կողմից։ Ընտրված մասնակիցները կտեղեկացվեն արդյունքների մասին մինչև մարտի 10-ը։

Լրացուցիչ հարցերի համար խնդրում ենք կապ հաստատել ծրագրի համակարգող Աշոտ Փափազյանի հետ [email protected] էլ․փոստի հասցեով կամ +374 98 96 67 52  հեռախոսահամարով։

 

Ծրագիրն իրականացվում է Շվեդական միջազգային զարգացման համագործակցության գործակալության (Sida) կողմից ֆինանսավորվող և Շվեդիայի Արվեստի դրամաշնորհների կոմիտեի կողմից իրականացվող ArtNexus ծրագրի օժանդակությամբ։

ԺԱԻ-ի մասին

ԺԱԻ–ն ժամանակակից արվեստի ոլորտում նախագծերի ձևավորման և արտադրման բաց հարթակ/կենտրոն/խառնարան է։ ԺԱԻ–ն խթանում/նպաստում է Հայաստանում արվեստի տնտեսության զարգացմանը, ձևավորում և իրականացնում է արվեստի հավաքածուների, ցուցահանդեսների, արխիվացման ու տարածման նախագծեր, նաև վարում է կուրատորական գործունեության, տեսության և արվեստի ոլորտում հետազոտություններ։ Իբրև անձերի և գաղափարների միջգործառնական ցանց՝ ԺԱԻ-ի դպրոցը, նախագծերի և հետազոտությունների լաբորատորիաներն առաջարկում են ռեսուրսներ, տեխնիկական հարմարություններ/պայմաններ և գործիքներ՝ հայաստանյան արվեստի դաշտում և ավելի լայն՝ համաշխարհային համատեքստում գործելու և մտածելու համար։

Կայք |  ԺԱԻ Instagram |  ԺԱԻ Facebook

ArtNexus-ի մասին 

ArtNexus-ը Շվեդական միջազգային զարգացման համագործակցության գործակալության (Sida) կողմից ֆինանսավորվող և Շվեդիայի Արվեստի դրամաշնորհների կոմիտեի կողմից իրականացվող միջազգային ծրագիր է՝ ուղղված ստեղծագործական ազատությանը, մշակութային ոլորտի զարգացմանը և ժողովրդավարական գործընթացների ամրապնդմանը։

ArtNexus ծրագրի մասին ավելին կարդացեք հետևյալ հղումներով․

Կայք : ArtNexus in English | ArtNexus on Instagram | ArtNexus on Facebook